Bleona Qereti ka shënuar një tjetër moment historik në karrierën e saj ndërkombëtare: ajo është shfaqur në ballinën kryesore të revistës amerikane “Vogue”, një nga platformat më prestigjioze të modës në botë.

Këngëtarja dhe ikona pop është pjesë e një editoriali të posaçëm të botuar për Amerikën Latine. Në fotografinë kryesore, Bleona shfaqet e veshur plot elegancë me të zeza nga stilistë të njohur, ndërsa shkëlqen me aksesorët prej diamanti të shtëpisë luksoze Bulgari.

“Vogue” e prezanton atë si një superyll të dashur nga disa breza dhe një figurë që qëndron përtej skenës — si simbol qëndrueshmërie, stili dhe fuqizimi.

Ndryshe nga prezantimet e zakonshme të yjeve, fokusi këtë herë nuk është te tapeti i kuq apo karriera muzikore, por te mënyra se si Bleona e përkufizon bukurinë: si disiplinë personale, si stil i ndërtuar me përkushtim dhe si një formë qëndrese ndaj sfidave.

Në artikull, ajo ndan mësime rreth kujdesit për veten, pamjes dhe imazhit publik, përmes historive të jetës së saj nga Shqipëria tek skena ndërkombëtare, Evropa dhe Hollyëood-i.

Ky sukses e ka bërë këngëtaren jashtëzakonisht krenare, duke e vendosur edhe një herë në hartën globale të personazheve që inspirojnë me punë, dedikim dhe vizion artistik.