Deputeti i Partisë Demokratike, Luçiano Boçi, ka denoncuar sot në Kuvend mënyrën si mazhoranca po menaxhon Komisionin e Posaçëm për Reformën Territoriale, duke e cilësuar këtë si një veprim të njëanshëm që shkel rregulloren parlamentare dhe paritetin e vendosur.

Boçi u shpreh se nuk ka pasur marrëveshje në Konferencën e Kryetarëve dhe se ultimatumet e dhëna për mbledhjen e komisionit janë të papranueshme. Ai theksoi se mbledhja e komisionit është thirrur pa dakordësinë e tij si bashkëkryetar, çka e bën atë të pavlefshme.

“Ju morët gjithçka me pushtetin e votave dhe imponuat ndryshimin e përbërjes së komisionit. Kjo është e turpshme dhe nuk ka asnjë konsultim me kryesinë e komisionit. Ne do t’i japim qytetarëve opsionin tonë, por jo me imponim nga shumica,” tha Boçi.

Deputeti akuzoi mazhorancën se po përdor shumicën për të marrë gjithçka, përfshirë edhe komisionet e përhershme, dhe theksoi se qytetarët nuk duhet t’i pranojnë këto praktika njëanshme.