Brad Pitt ka ndarë reflektimet e tij më të sinqerta mbi jetën personale dhe gabimet e kaluar, vetëm pak kohë pasi përfundoi zyrtarisht divorcin e gjatë nga Angelina Jolie. Në një intervistë për Entertainment Tonight gjatë premierës së filmit të tij “F1” në Meksikë, aktori 61-vjeçar foli hapur për vetëdijen, marrëdhëniet dhe rëndësinë e lidhjeve njerëzore.

“Çfarëdo gabimi që bën… mëson prej tij dhe ecen përpara,” tha Pitt, duke theksuar se gabimet janë pjesë e rrugës drejt suksesit. Ai shtoi se në këtë fazë të jetës, lidhjet me njerëzit e zemrës, miqtë dhe familjen, janë themeli i qetësisë dhe lumturisë së tij.

Aktori aktualisht është në një marrëdhënie me Ines de Ramon dhe duket më i qetë se kurrë më parë. Komentet e tij erdhën dy javë pas përfundimit ligjor të martesës së tij me Jolie, një proces që zgjati tetë vjet.

I pyetur nga revista GQ nëse ndjeu lehtësim pas divorcit, Pitt u shpreh: “Jo, nuk mendoj se ishte ndonjë gjë kaq e madhe. Ishte thjesht diçka që u finalizua ligjërisht.”

Ndërkohë, përmes avokatit të saj, Angelina Jolie ka deklaruar se pas ndarjes po fokusohet në “gjetjen e paqes dhe shërimin për familjen”. Ish-çifti kanë gjashtë fëmijë, por raportimet e fundit tregojnë një marrëdhënie të ftohtë mes Brad Pitt dhe disa prej tyre, që thuhet se kanë hequr mbiemrin e tij.