Festa e 50-vjetorit të David Beckham, e mbajtur me bujë në Londër më 3 maj, u përfol jo vetëm për emrat e njohur të ftuar, por edhe për mungesën e ndjeshme të djalit të madh, Brooklyn Beckham, dhe bashkëshortes së tij, Nicola Peltz.

Sipas burimeve të “People”, arsyeja e mungesës nuk ishte vetëm kalendari i ngarkuar. Dyshohet se çifti nuk dëshironin të ishin në të njëjtën ambient me Romeo Beckham – vëllain e Brooklyn-it – dhe të dashurën e tij, DJ Kim Turnbull. Sipas thashethemeve, Turnbull ka pasur një lidhje të mundshme me Brooklyn-in në të shkuarën, çka i ka bërë marrëdhëniet mes palëve të tendosura. Edhe pse kjo lidhje nuk është konfirmuar zyrtarisht, Cruz Beckham e mohoi publikisht në një koment në Instagram, duke shkruar: “Brooklyn dhe Kim nuk kanë qenë kurrë bashkë.”

Burime pranë çiftit pohojnë se Brooklyn dhe Nicola kishin udhëtuar nga SHBA drejt Londrës pikërisht për të qenë të pranishëm në festimet për ditëlindjen e David Beckham, ose të paktën për një darkë private familjare. Ata qëndruan për gjashtë ditë në qytet, por nuk arritën të takoheshin me Davidin. Mendohet se janë ndjerë të përjashtuar, ndërsa burime të tjera sugjerojnë se ka pasur disa evente pa praninë e Kim Turnbull, ku çifti mund të ishte bashkuar me familjen.

Megjithëse tensionet brenda familjes Beckham nuk konsiderohen të pakapërcyeshme, burimet raportojnë një distancim të qartë të Brooklyn-it dhe Nicolas nga aktivitetet familjare, gjë që ka lënduar Davidin dhe Victorinë. Duket se një lidhje e vjetër, xhelozitë dhe ndjeshmëritë e pashprehura po ndikojnë në raportet brenda një prej familjeve më të njohura në Britani.