Brunilda Mersini mori dje zyrtarisht detyrën si kryetare e Bashkisë së Vlorës, në një ceremoni të zhvilluar në teatrin “Petro Marko”, ku të pranishëm ishin drejtues politikë të PS-së dhe këshilltarë bashkiakë socialistë, ndërsa munguan përfaqësuesit e opozitës.

Në fjalën e saj, Mersini e konsideroi detyrën si një mision dhe përgjegjësi ndaj qytetarëve, duke nënvizuar vizionin për zhvillimin e Vlorës dhe tërheqjen e projekteve të reja, duke përfshirë edhe aeroportin: “Së bashku me qytetarët dhe çdo partner do të krijojmë një frymë bashkëpunimi për të çuar përpara projektet e qytetit dhe për të thithur projekte të reja në një qytet që do të jetë porta e re e Europës.”

Ndërkohë, gjatë ditës qytetarë dhe përfaqësues të biznesit protestuan përpara bashkisë kundër vendimeve të Inspektoriatit të Mbrojtjes së Territorit (IMT) për lirimin e hapësirave publike. Bizneset shprehen se këto vendime po ndikojnë drejtpërdrejt tek investimet, punësimi dhe ekonomia lokale, duke kërkuar transparencë për projektet, fazat e zbatuara dhe kush do të mbajë kostot nga ndërhyrjet dhe prishjet e hapësirave.

Ceremonia e marrjes së detyrës dhe reagimet e qytetarëve dhe bizneseve shënojnë një nisje të nxehtë për mandatin e ri të kryebashkiakes Mersini.