Reshje të dendura dëbore kanë përfshirë Bulqizën që prej orëve të para të mëngjesit, duke zbardhur zonën dhe shoqëruar territorin me temperatura nën zero. Kushtet e vështira meteorologjike kanë krijuar probleme të dukshme në qarkullim, sidomos në aksin nacional Bulqizë – Ura e Çerenecit, ku raportohet prezencë akulli në disa segmente rrugore.

Policia i bën apel drejtuesve të mjeteve të tregojnë kujdes maksimal, të shmangin lëvizjet e panevojshme, të ulin shpejtësinë dhe të respektojnë sinjalistikën rrugore. Ngricat, sipas uniformave blu, rrisin ndjeshëm rrezikun e aksidenteve në këto orë.

Ndërkohë, kompania e mirëmbajtjes rrugore ndodhet në terren, duke punuar për kriposjen e rrugëve me qëllim shmangien e akullit dhe lehtësimin e qarkullimit.

Për shkak të kushteve të acarta, disa fshatra të Bulqizës raportohet se kanë mbetur pa energji elektrike. Ekipet e OSHEE-së po punojnë për rikthimin e furnizimit, megjithëse reshjet e dendura vijojnë të krijojnë vështirësi.

Situata meteorologjike mbetet në monitorim të vazhdueshëm.