Revista e njohur “People” ka shpallur edhe këtë vit fituesin e titullit tradicional “Burrin më seksi në botë”, dhe këtë herë vëmendjen e ka marrë Jonathan Bailey, aktori britanik 37-vjeçar që ka rrëmbyer zemrat e miliona fansave në mbarë botën.
Emri i tij u zbulua të hënën mbrëma, më 3 nëntor, gjatë emisionit televiziv “The Tonight Show with Jimmy Fallon”, duke shkaktuar reagime të shumta në rrjetet sociale.
Bailey u bë i njohur ndërkombëtarisht falë rolit të tij si Anthony Bridgerton në serialin “Bridgerton”, ndërsa më pas ka luajtur edhe në superprodhime si “Jurassic World Rebirth”, “Wicked” dhe vazhdimin e tij “Wicked: For Good”.
Një figurë e dashur dhe e admiruar në industrinë e filmit, Bailey është gjithashtu një përfaqësues i hapur i komunitetit LGBTQI, me role të spikatura në serialet “Fellow Travelers” dhe “Heartstopper”.
Në një reagim pas shpalljes, aktori u shpreh me humor dhe modesti:
“Është një nder i madh. Natyrisht, jam jashtëzakonisht i kënaqur. Dhe është plotësisht absurde. Mezi pres që disa miq dhe familjarë ta mësojnë,” – tha ai me një buzëqeshje.
Ky titull vitin e kaluar mbahej nga John Krasinski, ndërsa më parë janë vlerësuar edhe Chris Evans, Michael B. Jordan, Ryan Reynolds, Dwayne Johnson, Idris Elba, Paul Rudd, David Beckham e shumë të tjerë.
