Oerd Bylykbashi, drejtuesi politik i qarkut të Durrësit për Partinë Demokratike, zhvilloi një takim me anëtarët e kryesisë dhe kryetarët e grupseksioneve në Fushë Krujë, ku shprehu shqetësim të thellë për krizën politike që po kalon vendi. Gjatë fjalimit të tij, Bylykbashi dënoi ashpër veprimet e qeverisë së Edi Ramës, duke theksuar se arrestimi politik i kryetarit të Partisë Demokratike, Sali Berisha, dhe burgosja e Ervin Salianjit, nënkryetarit të grupit parlamentar të PD-së, përfaqësojnë një shkelje flagrante të të drejtave dhe lirisë demokratike.

Në takimin me anëtarët e kryesisë dhe kryetarët e grupseksioneve në Fushë Krujë, u trajtua me shqetësim të thellë kriza e paprecedent që po kalon vendi ynë dhe demokracia jonë.
Arrestimi politik i Kryetarit të Opozitës, Prof. Dr. Sali Berisha, dhe burgosja politike e nënkryetarit të Grupit Parlamentar, Ervin Salianji, përbëjnë një tejkalim të qartë të vijave të kuqe. Kjo situatë kërkon një reagim të fortë, të qartë dhe të organizuar nga ana jonë.
Me Edi Ramën në pushtet, vendi është i privuar nga zgjedhjet e lira, pluralizmi politik, dhe shteti i së drejtës. Nuk ekzistojnë më as Kushtetuta, Drejtësia, apo liritë themelore të qytetarëve. Rrëzimi i tij është i domosdoshëm për rikthimin e vlerave demokratike dhe rendit kushtetues.

Ai bëri thirrje për një reagim të organizuar, të fuqishëm dhe të qartë nga radhët e opozitës për t’u përballur me këtë situatë, duke theksuar se vendi është përballë një krize të paprecedent në historinë e tij politike.