Ministria e Mbrojtjes ka reaguar pas çarjes së digës në Bunec, duke bërë të ditur se janë dëmtuar 12 biznese dhe dy familje kanë pësuar dëme në bazat ushqimore dhe blegtorale. Çarja ndodhi rreth orës 12:26, kur ujëmbledhësi i Sasajt, ndërtuar në vitin 2010, ka pësuar shembje, duke lënë rreth 15.000 metra kub ujë. Për pasojë, ujë dhe baltë kanë përfshirë 12 biznese në zonë, ndërsa dy familje kanë humbur baza ushqimore dhe blegtori. Sipas Ministrisë, fatmirësisht nuk ka pasur viktima.
Aktualisht, rruga nacionale Bunec-Piqeras është e kalueshme dhe strukturat e bashkisë Himarë po punojnë për pastrimin e baltës. Situata po monitorohet nga Prefektura e Vlorës dhe emergjencat civile, ndërsa Ministria e Mbrojtjes dhe Agjencia Kombëtare e Mbrojtjes Civile janë në gatishmëri për ndihmën e komunitetit.
