Prokuroria belge ka kërkuar këtë të martë një dënim shtesë prej 6 vitesh burg për shtetasin shqiptar Klodjan B., një nga 34 të pandehurit në çështjen penale ndërkombëtare të koduar “Black Eagle”, e cila përfshin trafik të organizuar droge mes Amerikës Latine dhe Europës.

Klodjan B. është i dënuar më parë nga gjykatat holandeze me 30 muaj burg të pezulluar për veprime të ngjashme dhe në të njëjtën periudhë kohore (2018-2022), por hetuesit belgë e konsiderojnë rolin e tij shumë më të thelluar në aktivitetin kriminal.

Sipas akuzës, gjatë arrestimit në prill 2021, në automjetin e tij u sekuestruan tetë kilogramë kokainë, por hetimet zbuluan edhe më shumë: komunikimet e përgjuara dhe të dhënat e telefonit të tij e lidhin atë edhe me përgatitjen e drogës, si dhe me rolin e “nxjerrësit” – person që rikuperon ngarkesat e kokainës të fshehura në trupat e anijeve në porte, përmes përdorimit të pajisjeve të zhytjes.

Në mbrojtje të të pandehurit, avokatët e tij u mbështetën te parimi juridik “non bis in idem”, që ndalon gjykimin dy herë për të njëjtat vepra penale. Megjithatë, prokuroria këmbëngul se dënimi i mëparshëm nuk reflekton nivelin e vërtetë të përfshirjes së tij, dhe kërkon një dënim të ri që pasqyron rolin e tij në këtë rrjet kriminal ndërkombëtar.

Klodjan B. është një nga emrat e përmendur në dosjen voluminoze, ku figurojnë edhe emra të njohur nga hetimet për trafikun e kokainës si Artur S., Indrit Kulaj, Arben I., Alfredo dhe Arten Hamzai, Fjodor B., Aldo T., Llazar S., Marsel A., Geron Z., si dhe kosovari Bashkim O., të cilët konsiderohen si disa nga lojtarët më të mëdhenj shqiptarë në tregun e kokainës në Europë.

Vendimi i gjykatës për Klodjan B. pritet të merret në javët në vijim, ndërsa procesi “Black Eagle” mbetet një nga çështjet më të mëdha penale që kanë ekspozuar rrjete të fuqishme të trafikut të drogës të drejtuara nga shqiptarë në Europë.