Agjencia e Shteteve të Bashkuara për Zhvillim Ndërkombëtar (USAID) do të vazhdojë funksionin e saj si agjenci ndihme, por plani përfshin një reduktim të ndjeshëm të financimit të saj dhe fuqisë punëtore, raporton CBS News, partneri i BBC-së në SHBA.

Sekretari i Shtetit amerikan, Marco Rubio, njoftoi të hënën se ka marrë rolin e drejtorit të përkohshëm të Agjencisë për Zhvillim Ndërkombëtar të SHBA (USAID), pas deklaratave të Elon Musk, njeriut më të pasur në botë dhe përgjegjës për reformimin e qeverisë federale, se Presidenti Donald Trump kishte miratuar mbylljen e kësaj agjencie.

Në Uashington, selia e USAID u mbyll gjatë ditës, dhe punonjësve iu dërgua një email që t’ë qëndronin në shtëpi. Logot dhe fotot e agjencisë u hoqën nga muret e ndërtesës, ndërsa faqja e internetit dhe llogaritë në rrjetet sociale u zhdukën. “Po ndodh apokalipsi në USAID,” tha një punonjës i agjencisë.

USAID, e krijuar nga Kongresi si një agjenci e pavarur për ndihmën ndërkombëtare, është bërë objekt i përpjekjeve të Trump dhe Musk për të reformuar qeverinë federale. Kritikët e akuzojnë agjencinë për prirje partiake, ndërsa demokratët e kundërshtojnë mbylljen dhe thonë se Trump nuk ka autoritet për ta shkatërruar atë.

Deklaratat e Musk gjatë një diskutimi në platformën sociale X ishin ato që nxitën zhvillimet e fundit. Musk tha se kishte diskutuar me Trump për mbylljen e agjencisë, dhe presidenti kishte rënë dakord që ta mbyllnin.

Punonjësit e USAID-it morën një email pas mesnate për t’u njoftuar se nuk duhej të shkonin në zyrat e agjencisë dhe u urdhëruan të punonin nga distanca, përveç disa që kishin detyra të nevojshme në terren. Ata shprehen shqetësim se mund të humbnin aksesin në sistemet e agjencisë dhe do të mbeteshin pa informacione të nevojshme.