Pushimet e fundvitit janë shpesh të lidhura me ngjarje festive, dekore të bukura dhe mjedise gëzuese, por gjithashtu mund të sjellin një sërë presionesh dhe stresesh, të cilat ndikojnë në trupin tonë. Sipas nutricionistes dhe ekspertes së hormoneve, Emma Wiley, periudha e pushimeve mund të ketë efekte të ndryshme fiziologjike dhe emocionale, të cilat janë të lidhura me ndryshimet hormonale dhe veprimet e stresit në trup.

Gjatë festave, trupi jonë mund të përjetojë një rritje të nivelit të hormonit të stresit, kortizolit, për shkak të presionit financiar, detyrimeve familjare dhe aktiviteteve të shumta. Kjo mund të shkaktojë lodhje, ndryshime humori dhe një sistem imunitar të dobësuar, pasi kortizoli në nivele të larta mund të ndikojë negativisht në funksionin e qelizave të bardha të gjakut dhe të rrisë ndjeshmërinë ndaj infeksioneve.

Gjithashtu, stresi i lidhur me pushimet mund të ndikojë në sistemin tretës për shkak të lidhjes tru-zorrë, duke shkaktuar simptoma si nauze, ngërçe, urth ose kapsllëk. Ushqimet e pasura me sheqer dhe alkooli, të cilat janë të zakonshme gjatë festave, mund të përkeqësojnë këtë ndjeshmëri dhe të dëmtojnë mikrobiomën e zorrëve.

Ndërkohë, ditët më të shkurtra të dimrit dhe rritja e melatoninës mund të sjellin ndjenja letargjie ose depresion sezonal (SAD), duke shtuar nevojën për më shumë pushim dhe introspeksion. Megjithatë, të pasurit e mundësive për ndërveprime sociale, si takimet me miqtë dhe familjen, mund të aktivizojnë “hormonet e lumturisë” si dopamina, serotonina dhe oksitocina, duke rritur disponimin dhe ndjenjën e lidhjes me të tjerët.

Për të menaxhuar më mirë këtë periudhë, është e rëndësishme të kuptojmë veprimin e këtyre hormoneve dhe të përpiqemi të ruajmë një ekuilibër mes aktiviteteve festive dhe kujdesit për veten.