LONDËR – Reperi i njohur amerikan Chris Brown, 36 vjeç, është paraqitur sot para Gjykatës së Lartë të Southwark, ku dha dëshminë e tij në lidhje me një sulm të dyshuar fizik ndaj producentit Abraham Diaw, ndodhur në një klub nate në Londër në shkurt 2023.

Sipas Prokurorisë Britanike, Brown dyshohet se e ka goditur viktimën me një shishe në kokë disa herë, dhe më pas e ka ndjekur në një zonë tjetër të lokalit ku e ka rrahur me grushta dhe shqelma, ndërkohë që viktima ndodhej i shtrirë në tokë. Pamjet filmike nga kamerat e sigurisë konsiderohen si prova kyçe në këtë çështje, ndërsa akti përshkruhet nga prokurorët si “sulm jashtëzakonisht i dhunshëm dhe i qëllimshëm”.

Arrestuar në Manchester, liri me kaucion 5 milionë paundë

Brown u arrestua në Manchester më 15 maj, menjëherë pas mbërritjes në Mbretërinë e Bashkuar me avion privat për një koncert. Ai u lirua nga paraburgimi me një kaucion të majmë prej 5 milionë paundësh, por me kushte shumë të rrepta, përfshirë:
• Detyrimin për të qëndruar në një adresë të përcaktuar në MB
• Ndalim qasjeje në klubin “Tape” në Londër ku ndodhi incidenti
• Ndalim kontakti me viktimën, dëshmitarët dhe bashkëpandehurin
• Përdorimi i pasaportës vetëm për aktivitete të lidhura me turneun muzikor

Nëse shkel ndonjë nga këto kushte, rrezikon të humbasë garancinë dhe të burgoset sërish.

Bashkëpandehuri i çështjes: reperi Omololu Akinlolu

Në sallën e gjyqit ishte i pranishëm edhe bashkëpandehuri i çështjes, reperi amerikan Omololu Akinlolu, 38 vjeç, i cili akuzohet për pjesëmarrje në të njëjtin incident. Procesi gjyqësor pritet të nisë në fund të vitit, me përgatitjet që do të zhvillohen në javët në vijim.

Chris Brown, i cili ka një histori të mëparshme për dhunë – përfshirë rastin famëkeq të vitit 2009 me këngëtaren Rihanna – rrezikon ndjekje penale të rëndë nëse shpallet fajtor për këtë sulm.

Gjyqi përflitet të jetë një nga më të ndjekurit në Mbretërinë e Bashkuar këtë vit, duke tërhequr vëmendje të madhe nga mediat ndërkombëtare dhe opinioni publik.