Christian Eriksen u rrëzua gjatë ndeshjes së djeshme mes Danimarkës dhe Finlandës. Dueli i Euro 2020 që u luajt në Kopenhagen, u ndërpre për shumë minuta. Momente të rënda dhe trishtuese, me fantazistin e Interit që po luftonte me vdekjen.
Për fat të mirë, Eriksen i shpëtoi arrestit kardiak dhe ndodhet në gjendje të stabilizuar. E ardhmja është e zymtë dhe 29-vjeçari nordik mund ta ketë mbyllur me futbollin për shkak të problemeve me zemrën.
Sanjay Sharma është profesor i kardiologjisë sportive në Universitetin St George në Londër dhe ka punuar me Eriksen gjatë kohës kur luante me Tottenham Hotspur. Në prononcimin e dhënë për BBC, Sharma foli në lidhje me këtë çështje.
“Padyshim që diçka shkoi shumë keq. Mjekët arritën ta kthejnë atë përsëri në jetë, por pyetja është se çfarë ndodhi? Dhe pse ndodhi? Arresti i tij kardiak i tronditi të gjithë. Lajmi i mirë është që djali shpëtoi.
Lajmi i keq është se ai është afër fundit të karrierës. Nuk mund ta them nëse do të zbresë sërish në fushë. Në Mbretërinë e Bashkuar ai nuk do të lejohej të luante, ne do të ishim shumë të rreptë në këtë rast.
Fakti që ndodhet në gjendje të stabilizuar dhe është përmendur është një lajm shumë i mirë, por nuk besoj se do mund të luajë sërish futboll si profesionist“, deklaroi profesori.
