Presidentja e sapozgjedhur e Meksikës, Claudia Sheinbaum, ka konfirmuar publikisht se ka refuzuar një propozim të drejtpërdrejtë nga presidenti amerikan Donald Trump për të vendosur trupa amerikane në Meksikë, me qëllim luftimin e karteleve të drogës.

Gjatë një deklarate të mbajtur në një ngjarje publike, Sheinbaum vërtetoi raportin e publikuar nga Wall Street Journal, sipas të cilit Trump i kishte propozuar në disa biseda telefonike që ushtria amerikane të angazhohej direkt në territorin meksikan. “Është e vërtetë,” tha ajo. “Në disa telefonata, presidenti Trump më ka thënë: ‘Si mund t’ju ndihmojmë? Unë propozoj që Ushtria e Shteteve të Bashkuara të hyjë për t’ju ndihmuar’.”

Por Sheinbaum, e cila është presidentja e parë grua në historinë e Meksikës, ka refuzuar prerazi:
“Jo, president Trump, territori ynë është i patjetërsueshëm. Sovraniteti është i patjetërsueshëm. Ne mund të bashkëpunojmë, por ju në territorin tuaj dhe ne në tonin.”

Ajo shtoi se Meksika është e hapur për shkëmbim informacioni dhe bashkëpunim të ngushtë, por jo për praninë fizike të ushtrisë së një vendi të huaj.

Kjo përgjigje vjen në një moment kur presioni ndaj qeverisë meksikane për të luftuar kartelet është në rritje, ndërkohë që fushata elektorale në SHBA ka vendosur sigurinë kufitare dhe trafikimin e drogës si një nga temat kyçe.