Vlorë – I deleguari politik i Partisë Socialiste, Bledi Çuçi, zhvilloi dje një mbledhje me kryesinë e këshilltarëve socialistë në selinë e partisë, për të diskutuar emrin që do të propozohet si pasues i kryebashkiakut Ermal Dredha.

Sipas burimeve nga takimi, Çuçi theksoi se nuk është e përshtatshme që këshilltarët të paraqesin disa kandidatura, duke sugjeruar një emër të vetëm. Ai propozoi Elis Halilin si personin më të përshtatshëm për të marrë përgjegjësitë kryesore në qytet, duke u fokusuar tek sektorët e punës publike dhe infrastrukturës.

Megjithatë, ky propozim ka shkaktuar kundërshtime brenda këshillit, pasi disa socialistë u shprehën se Halilin nuk e njohin mjaftueshëm dhe ndoshta do të ishte më i përshtatshëm një kandidat tjetër.

Në mbledhje ishte i pranishëm edhe vetë Ermal Dredha, i cili shprehu keqardhjen për lënien e mandatit në mes: “Mund të kishim bërë edhe më shumë, por kemi bërë më të mirën për qytetin,” tha ai. I pranishëm ishte edhe Elis Halili, për të ndjekur zhvillimet e diskutimit.