Për herë të parë pas marrjes së detyrës si Kryeinspektor, Dashnor Sula ka dhënë një intervistë për Top Channel, ku ka shpjeguar arsyet pse pranoi ftesën e kundërshtarit të tij politik, Edi Rama, si dhe ka komentuar reagimet nga kreu i Partisë Demokratike, Sali Berisha.

Ish-deputeti demokrat, me një karrierë 20-vjeçare nën siglën e PD-së, tha se vendimi për të pranuar detyrën nuk ishte i lehtë, por e konsideroi si një sfidë institucionale.

“Dhunshëm u përzura dhe nuk kisha asnjë të ardhme që të përfshihesha për të dhënë këtë kontribut. Z. Rama më hodhi dorashkën dhe më paraqiti sfidën për të marrë pjesë në ndërtimin e një institucioni të shtetit shqiptar”, u shpreh Sula.

I pyetur nëse kishte dilema për të pranuar postin, duke qenë se do të menaxhojë 17 inspektoriate pas reformës së re, ai pranoi: “Fillimisht e kisha të vështirë. Por më ka thënë z. Rama se qytetarët shqiptarë nuk janë vetëm socialistët… Kostumin e politikanit unë e kam lënë në shtëpi dhe kam veshur kostumin e një nëpunësi të shtetit.”

Sa i përket afrimit me Ramën, pavarësisht përplasjeve të mëhershme në Parlament, Sula vlerësoi një aspekt të kryeministrit: “Nëse do të gjeni një moment të vetëm që z. Rama është një person që i hyn në familje të politikanit tjetër. Nuk ka.”

Ndërsa për reagimin e Sali Berishës, ai shmangu komentet politike: “Nuk do ja lejoja vetes dhe nuk do të ishte e moralshme që të vazhdoj të bëj komente politike.”

Në lidhje me sfidat e detyrës së re, Kryeinspektori theksoi nevojën për reformim të sistemit: “Të shkëputemi nga modeli që ka qenë përgjatë këtyre 35 viteve dhe shpresoj se deri në fund të vitit të kemi një sistem të digjitalizuar.”