Një debat i ri ka shpërthyer në Kuvendin e Shqipërisë mbi të drejtën për ndryshimin e gjinisë pas lindjes. Partia Demokratike propozoi një amendament në ligjin e gjendjes civile, duke kërkuar që gjinia të mbetet biologjikisht e pandryshueshme.

Amendamenti u rrëzua nga mazhoranca gjatë mbledhjes së komisionit të shëndetësisë dhe mirëqenies sociale, që e cilësoi të panevojshëm, duke theksuar se ligji aktual nuk lejon regjistrimin e një gjinie të ndryshuar dhe njeh vetëm gjininë e përcaktuar në lindje: mashkull ose femër.

Relatori i projektligjit, demokrat Tritan Shehu, argumentoi se ndryshimi është i nevojshëm për të mbrojtur familjen:

“Nëse në certifikatat tona nuk përcaktohet qartë gjinia në momentin e lindjes, nëse ajo bëhet e ndryshueshme sipas perceptimit personal, atëherë bie themeli i identitetit gjinor. Ky është deformim gjuhësor dhe moral që zhduk konceptin e familjes.”

Nga ana tjetër, socialist Eduard Shalsi e cilësoi propozimin si “tym-najë” dhe përpjekje për të krijuar zhurmë në një çështje të ndjeshme:

“Kur ne kemi firmosur konventën e të drejtave të njeriut, nuk ka nevojë për këtë nismë.”

Grupi i organizatave që mbrojnë të drejtat e LGBTI ka reaguar gjithashtu, duke e cilësuar si keqinformim dhe nismë antikushtetuese që mund të nxisë diskriminimin ndaj komunitetit.