Pas ceremonisë mortore të të atit, Anesti Rama, e shoqëruar nga dhimbja për humbjen dhe tronditjen nga arrestimi i nënës dhe motrës së saj, Kristiola Rama – vajza e madhe e familjes që jeton në Itali – ka rrëfyer për mediat momentet kur mori lajmin për ngjarjen e rëndë.

E ardhur nga emigracioni me tre fëmijët e saj për të marrë pjesë në varrim, Kristiola tregon telefonatën e motrës së vogël, Emanildës, që fillimisht i tha se babai kishte pësuar një aksident në banjë:

“Nga ora 8 më ka marrë motra në telefon që babi kishte rënë në banjo. Edhe më tha kështu: o motra ka rënë babi në banjo. Edhe i thashë ça po thua dhe fik telefonin. Pastaj e marr pas 5 minutash edhe më thotë mami ik se po merremi me babin se po e vishnin a po e lanin nuk e di. Edhe e fika prap telefonin. I rashë prap mamit nuk ma hapi telefonin dhe mora kunatën që të merrja vesh. Kur po e lante mami dëgjova një si zë dhe i thashë: mami është babi gjallë? Jo tha ka vdekur”, – tregon Kristiola me një qetësi të ftohtë, që e justifikon vetëm shoku i ngjarjes.

Kristiola u kthye në Shqipëri një ditë më parë, por në vend të një aksidenti, mësuar në fillim, hasi të vërtetën e rëndë: babai i saj ishte vrarë me tel nga motra e vogël, ndërsa e ëma dyshohet se ka ndihmuar në fshehjen e krimit.

Ngjarja ka tronditur Frashërin e Patosit dhe të gjithë opinionin publik, ndërsa hetimet për krimin familjar vijojnë.