Roma – Kryeministrja Giorgia Meloni ka vendosur të ashpërsojë ligjet e sigurisë me një dekret të ri që parashikon dënime më të rënda dhe heqjen e alternativave të burgut si arresti shtëpiak apo shërbimi ndaj komunitetit. Por kjo lëvizje po përballet me një mur të fortë: burgjet italiane janë tashmë në prag të shpërthimit!

Me mbi 62,000 të burgosur në ambiente të destinuara për vetëm 51,000, sistemi penal italian po rrëshqet drejt një kolapsi të plotë, me një mbipopullim prej 119 për qind, një nga më të lartat në Evropë. Dhe çështja nuk përfundon këtu…

Vetëvrasjet në burgje shënojnë nivele alarmante! Vetëm gjatë këtij viti janë regjistruar 33 raste të tragjedive personale brenda qelive, duke shkuar pranë rekordit shokues prej 91 vetëvrasjesh të vitit të kaluar.

Ekspertët dhe organizatat për të drejtat e njeriut hedhin alarmin: Ky dekret vetëm sa thellon izolimin dhe dëshpërimin e të burgosurve, duke i lënë ata në qeli të izoluara, pa mbështetje psikologjike dhe pa perspektiva për rehabilitim.

Burgu në Itali po shndërrohet në një bombë sociale, ndërkohë që mungesa e stafit, infrastruktura e vjetëruar dhe shërbimet e pamjaftueshme shëndetësore rrezikojnë të bëjnë një tragjedi të pashmangshme.

Në mes të kësaj krize, pyetja që shtrohet është e thjeshtë: A do të jetë në gjendje qeveria e Melonit të menaxhojë këtë shpërthim human dhe social, apo do të ngrihet një tjetër kufomë në hartën e të drejtave njerëzore në Evropë?

Zgjedhjet e ardhshme dhe tensionet në sistem po rriten, ndërsa Italia po përballet me një realitet që kërkon zgjidhje urgjente, para se të jetë vonë.