Portieri i Paris Saint-Germain, Gianluigi Donnarumma, ka pësuar një dëmtim të rëndë gjatë ndeshjes kundër Monakos, pas një ndërhyrjeje të ashpër nga futbollisti kundërshtar, Wilfried Singo. Incidenti ndodhi në minutën e 22-të, kur Singo e goditi portierin italian me shkelm në fytyrë gjatë një përplasje për topin.

Pas goditjes, Donnarumma mbeti i shtrirë në fushë me fytyrën e gjakosur, duke alarmuar lojtarët dhe stafin mjekësor të PSG-së. Mjekët i dhanë ndihmën e parë në fushë, por portieri u detyrua të largohej nga loja për shkak të dëmtimit serioz.

Momenti tronditës është duke bërë xhiron e rrjeteve sociale, duke ngjallur shqetësim mes tifozëve dhe komunitetit futbollistik. Gjendja e Donnarummës pritet të monitorohet me kujdes, ndërsa PSG ende nuk ka dhënë një njoftim zyrtar për shkallën e dëmtimit dhe kohën e rikuperimit të tij.

Ky incident është një tjetër goditje për PSG, që tashmë përballet me një sezon të vështirë në kampionat dhe në Ligën e Kampionëve.