Gjykata e Fierit ka dhënë vendimet për tre të pandehurit e arrestuar në lidhje me vrasjen e 89-vjeçarit Çaush Shehaj, ngjarje e ndodhur dy vite më parë në Patos të Mallakastrës.
Dënimet e dhëna nga Gjykata:
- Musa Gudo – Burgim i përjetshëm për “Vjedhje me armë” me pasojë vdekjen dhe “Mbajtje pa leje të armëve të zjarrit”.
- Ervis Halimi – 25 vite burgim për të njëjtat akuza si Musa Gudo.
- Fjorilo Çepele – 2 vite burgim për “Moskallëzim krimi”, ndonëse prokuroria kishte kërkuar 7 vjet e 6 muaj për “Vjedhje me armë” në bashkëpunim.
Si ndodhi krimi?
Ngjarja e rëndë ndodhi më 19 nëntor 2022, kur tre autorët sulmuan banesën e të moshuarit për ta grabitur. Ata hynë me forcë në shtëpi dhe e goditën Shehajn disa herë me shtratin e automatikut, duke i shkaktuar plagë të rënda. Viktima u gjet ende me shenja jete nga banorët e fshatit, por humbi jetën në spitalin e Fierit për shkak të dëmtimeve të rënda.
Kjo ishte hera e dytë që banesa e tij sulmohej. Gjashtë muaj para vrasjes, të moshuarit i ishin grabitur një shumë e vogël parash dhe një armë gjahu që e posedonte me leje. Për shkak të rrezikut të përsëritjes së një grabitjeje, nipi i tij e kishte këshilluar të largonte kursimet nga shtëpia, këshillë që ai e kishte ndjekur, duke ia besuar paratë një të afërmi.
Planifikimi i grabitjes
Sipas hetimeve, para se të kryenin krimin, Musa Gudo, Ervis Halimi dhe Fjorilo Çepele, së bashku me të dashurën e Gudos, darkuan në një restorant në fshatin Portëz. Më pas, tre autorët shkuan në banesën e Shehajt për ta grabitur.
I moshuari u dhunua brutalisht dhe u lidh në fytyrë me një qese, duke i shkaktuar humbje ndjenjash. Ai u gjet i gjallë në mëngjes, por ndërroi jetë në spital.
Vendimi i Gjykatës i jep fund një çështjeje që tronditi banorët e zonës dhe opinionin publik, ndërsa tre të pandehurit do të vuajnë dënimet për krimin e rëndë.
