Kreu i Partisë Demokratike, Sali Berisha, ka bërë publik një denoncim për një ngjarje të rëndë në Agjencinë Kombëtare të Ushqimit (AKU). Sipas mesazhit të qytetarit të publikuar nga Berisha, ish-prokurori Alket Mersini, aktualisht drejtor i Burimeve Njerëzore në AKU, ka goditur një punonjëse shtatzënë gjatë një mbledhjeje, në sy të gjithë pjesëmarrësve.

Denoncuesi shprehet se Mersini shkon çdo ditë në punë i dehur dhe ka ushtruar sjellje të dhunshme ndaj punonjësve të tjerë. Punonjësja e goditur ka pësuar një tronditje të madhe dhe ka tentuar të denonconte rastin, duke i dërguar mesazh edhe Kryeministrit, por sipas denoncimit, është kërkuar të heshtë.

Gjithashtu, gjatë incidentit kanë qenë prezentë disa pedagogë të UBT-së, ndërsa Mersini konsiderohet një prurje e ish-drejtorit të përgjithshëm Olsi Komici.

Berisha e cilëson këtë ngjarje si një skandal të rëndë institucional, duke theksuar se sjelljet e Mersinit janë të përsëritura dhe të papranueshme brenda institucioneve shtetërore.