I arrestuari Luçiano Deraj, i cili u kap në Vlorë dhe dyshohet se ka lidhje me grupet kriminale, ka mbetur i heshtur para policisë. Përpara oficerëve të policisë, ai ka refuzuar të japë informacion rreth origjinës së armëve dhe lidhjeve eventuale me grupet kriminale. Dyshimet e policisë sugjerojnë se Deraj ka ndihmuar grupet kriminale duke u vënë në dispozicion bazën e armatimit, e cila u zbulua në Babicë të Vlorës, dhe më pas i ka fshehur në banesën e tij.

Në banesën e 35-vjeçarit Deraj, pronar i një servisi makinash, u gjetën disa lloj armatimesh, si snajper, pistoleta, qindra fishekë, 7 kallëpe lëndë eksplozivi plastik, silenciatorë për armët, 4 dylbi optike, 2 palë dylbi, radiomarrëse me valët e policisë së Vlorës, targa dhe çelësa makinash, maska, fenelina dhe veshje të ndryshme.

Pjesë e armatimit të rëndë ishte dhe një pistoletë stilolaps.

Armët janë dërguar në Laboratorin e Policisë Shkencore për ekspertizë teknike, balistike dhe biologjike. Ekzaminimi i armëve do të kryhet pasi dyshohet se disa prej tyre të jenë përdorur në disa ngjarje kriminale të kohëve të fundit.