Tiranë – Kryetari i Bashkisë së Tiranës, Erion Veliaj, është arrestuar të hënën nga Prokuroria e Posaçme Kundër Korrupsionit dhe Krimit të Organizuar (SPAK), nën akuzat për korrupsion dhe pastrim parash.

Sipas burimeve nga hetimi, Veliaj dyshohet se ka përdorur fondet publike të bashkisë për të favorizuar kompani të lidhura me të dhe për të krijuar një rrjet të ndërlikuar transaksionesh financiare të dyshimta. Gjithashtu, bashkëshortja e tij, Ajola Xoxa, është vënë nën hetim për deklarime të rreme të pasurisë dhe përfshirje në skema financiare të paligjshme.

Hetimet kanë zbuluar se disa nga fondet publike të Bashkisë së Tiranës janë transferuar në organizata jofitimprurëse dhe kompani private të lidhura ngushtë me Veliajn dhe rrethin e tij të ngushtë. Në kuadër të këtij operacioni, SPAK ka vënë nën hetim edhe pesë biznesmenë të njohur si përfitues të këtyre skemave.

Në një deklaratë për media, SPAK ka theksuar se hetimet do të vijojnë për të zbardhur plotësisht skemat korruptive dhe për të vënë para drejtësisë të gjithë përgjegjësit. Arrestimi i Veliajt vjen pas disa muajsh hetimesh intensive dhe dëshmish të grumbulluara nga prokuroria.

Ngjarja ka shkaktuar reagime të forta në opinionin publik dhe politik, ndërsa pritet që hetimet të sjellin të tjera zhvillime në ditët në vijim.