TIRANË – Gazetarja e njohur Desada Metaj ka dhënë një koment të fortë lidhur me protestën e opozitës dhe zhvillimet në Kuvend rreth votimit për imunitetin e ish-zëvendëskryeministres Belinda Balluku, të enjten e kaluar.

Sipas Metaj, kontrasti mes protestës jashtë sallës dhe zhvillimeve brenda Kuvendit ngre pyetje serioze për strategjinë e opozitës. Ajo thekson se përballja politike duhej të zhvillohej brenda sallës ku merren vendimet dhe kërkohet llogaridhënie, jo në shesh.

“Gjatë muajve të fundit, një nga skenat më të dëshiruara për opozitën ka qenë gjithmonë e njëjta: të mësyjnë drejt Kuvendit, të hyjnë brenda, të kapërcejnë kordonin e policisë. Por sot ndodhi diçka e pazakontë: opozita ishte tashmë brenda sallës, me kartat e deputetit dhe me kryeministrin Edi Rama përballë, dhe vendosi të dalë jashtë për të mbajtur fjalime,” shkruan Metaj.

Gazetarja vlerëson se kjo lëvizje tregon një strategji të çuditshme politike, pasi trofeu – pushteti dhe mundësia për debat direkt me mazhorancën – ishte tashmë në dorë. “Në vend që të bëjë kilometrin e fundit drejt pushtetit, opozita nuk arriti të realizojë as edhe një metër brenda Kuvendit,” përfundon Metaj, duke nxjerrë në pah një tension mes simbolikës së protestës dhe logjikës institucionale.