Për dy ditë radhazi, dëshmia e ish-ministrit të Shëndetësisë, Ilir Beqaj, në Komisionin Hetimor Parlamentar për hetimin e koncesioneve në sektorin e shëndetësisë ka dështuar, ndërsa komisionit i përfundon afati në mesnatën e sotme. Në komision ka pasur debate të ashpra ndërmjet deputetëve të mazhorancës dhe opozitës, pasi opozita kërkon zgjatjen e afatit të komisionit dhe thirrjen si dëshmitar të kryeministrit Edi Rama dhe sipërmarrëses Vilma Nushi, përfituese e koncesionit të check-up-it, të cilët mazhoranca i mbron.

Ndërkohë, opozita ka ngritur akuza të reja kundër Beqajt, duke pohuar se gjatë këtyre ditëve të “lirisë” ai ka shfrytëzuar kohën për takime dhe lëvizje të lira në Kryesinë e Kuvendit, madje duke kërcënuar deputetët opozitarë. Ky incident u denoncua nga kryetarja e komisionit, deputetja e Partisë Demokratike, Albana Vokshi, e cila deklaroi se Garda dhe Policia nuk kanë ndërhyrë për ta ndaluar. Ajo publikoi një video ku pretendohet se Beqaj kërcënoi deputetët, ndërsa Garda dhe Policia e Burgjeve refuzuan ta dërgonin atë sërish në burg.

Sipas Vokshit, ky rast tregon dështimin e institucioneve dhe ndikimin e fuqishëm që Beqaj dhe aleatët e tij kanë në Kuvend. Ajo akuzoi qeverinë dhe institucionet përgjegjëse për mungesë veprimi ndaj Beqajt, duke theksuar se Parlamenti është i mbërthyer nga individë që i ofrojnë ish-ministrit garanci për lëvizje të lira dhe mundësinë për të kërcënuar ligjvënësit e opozitës.