Detaje të reja kanë dalë në dritë nga hetimet për grabitjen spektakolare që mbeti në tentativë, për një bankë të nivelit të dytë në Bulevardin Zogu i Parë në Tiranë.

Mësohet se autorët kishin më shumë se 20 ditë që po gërmonin në tunelin nëntokësor, ndërkohë që plani i tyre ka dalë zbuluar pasi është denoncuar nga banorët e zonës, që kishin dëgjuar zhurmën e matrapikut.

Kanë qenë banorët ata që kanë sinjalizuar policinë, për lëvizjet dhe zhurmat e çuditshme nëntokë.

Dyshohet se autorët kanë pasur një hartë të qartë të planimetrisë, ndërkohë që në tunel hynin të veshur me jelekë fosforeshentë, duke lënë të kuptohej se ishin punonjës të mirëmbajtjes.

Duket se plani i tyre është mirëmenduar prej kohësh, ndërkohë që gërmimet kanë zgjatur me ditë të tëra, pasi bëhet fjalë për një distancë të madhe për të mbërritur deri te banka.

Parapakisht dyshohet se ata kanë pasur informacion dhe për planimetrinë e godinës së bankës, ku do të duhej dhe të ishte përfundimi i tunelit. Grabitja në një kohë kur në bankë nuk kishte punonjës, mund ti jepte kohë autorëve që të largoheshin pa u identifikuar dhe arrestuar nga policia.

Ende nuk ka një profil apo identitet të autorëve, të kësaj grabitje, që do të ishte një nga më të ”çmendurat” në vendin tonë dhe jo vetëm.