Hetimet për atentatin në Athinë, ku humbi jetën 47-vjeçari shqiptar Irakli Davella dhe u plagos rëndë 46-vjeçari Edi Lulo, kanë zbardhur detaje të reja që hedhin dritë mbi ngjarjen. Sipas hetuesve, të dy viktimat ndodheshin në distancë nga njëri-tjetri kur atentatorët hapën zjarr ndaj tyre, çka ka shtuar dyshimet se të dy ishin objektiva të atentatit. Autori ose autorët, pasi qëlluan, u larguan në drejtim të paditur, duke i lënë viktimat të lënduar në rrugë.

Një hetim i mëtejshëm nga policia greke ka zbuluar se Edi Lulo ka qenë i njohur për autoritetet që në vitin 2004, nën emrin Etmond Hysa. Ai kishte një histori të gjatë kriminale, duke marrë pjesë në disa grabitje dhe incidente me armë. Gjatë vitit 2004, Lulo ishte i përfshirë në një grabitje parash në Palio Faliro, ku një roje u plagos gjatë shkëmbimit të zjarrit. Po në atë vit, ai ishte i lidhur edhe me një tjetër tentativë grabitjeje në një transfertë parash.

Një nga ngjarjet më të njohura është grabitja në Dhomën e Avokatisë në Athinë në prill të vitit 2011, ku ai dhe dy të tjerë grabitën rreth 405 mijë euro. Lulo ishte gjithashtu i përfshirë në grabitjen e pajisjeve mjekësore me vlerë 110.000 euro në një klinikë në Pagrati, që kishte për qëllim transportimin e këtyre mallrave në Shqipëri. Gjatë një shkëmbimi zjarri me policinë gjatë grabitjes në Pagrati, Lulo dhe grupi i tij mundën të arratisen.

Autoritetet greke janë të angazhuara në shkëmbimin e informacionit me palën shqiptare për të hetuar lidhjen e Edi Lulos me grupe kriminale shqiptare, duke përfshirë dyshimet për përfshirje në trafikun ndërkombëtar të drogës. Ai kishte mbërritur në Greqi më 9 dhjetor, duke fluturuar nga Duseldorfi në Gjermani, dhe ka lidhje të forta me aktivitetet kriminale ndërkombëtare.