Detaje të reja kanë dalë nga çështja e kanosjes së gjyqtarit të Fierit, Vladimir Cjapi, e cila ka çuar në shpalljen në kërkim të Arben Isufajt, i njohur ndryshe si “Ben Qimja”. Sipas burimeve nga policia, gjyqtari Cjapi dyshohet se ka në shqyrtim një çështje penale, ku i pandehur për akuzën e “Kundërshtimit të punonjësve të policisë” është njëri nga nipat e Isufajt.

Informacionet tregojnë se Vladimir Cjapi ka pasur njohje të mëparshme me familjen Isufaj, pasi para se të bëhej gjyqtar, ai ka ushtruar profesionin e avokatit në Fier, duke mbrojtur në procese të ndryshme penale dhe civile anëtarë të kësaj familjeje. Kjo histori e kaluar ka shërbyer si sfond për ndërhyrjet e mëvonshme të Arben Isufajt, i cili, duke shpresuar në një favor nga ish-avokati i familjes së tij, i ka kërkuar ndihmë për çështjen gjyqësore në fjalë.

Megjithatë, gjyqtari Cjapi ka refuzuar të ndërhyjë në vendimmarrjen e tij, çka duket se ka çuar në tensionim të situatës. Burime nga hetimi bëjnë me dije se përmes një personi të tretë, i njohur si nga Isufaj ashtu edhe nga gjyqtari, është përcjellë një mesazh kërcënues në drejtim të Cjapit, ku thuhej: “…Mbaje mend se çfarë do të bëjmë…”.

Policia dhe prokuroria po vazhdojnë hetimet mbi rastin, ndërsa Arben Isufaj mbetet në kërkim.