Hetimet për vrasjen e 14-vjeçarit Martin Cani kanë zbuluar detaje të reja, pas analizës së dosjes hetimore dhe këqyrjes së kamerave të sigurisë. Sipas informacionit të siguruar, fillimisht është kapur momenti kur personat e dyshuar janë parë duke kaluar një rrugicë pranë shkollës, në afërsi të vendit ku dyshohet se ka ndodhur konflikti që ka çuar në ngjarjen tragjike.

Për fat të keq, pamjet filmike nuk kanë fiksuar momentin e konfliktit, por ato ofrojnë pamje të tjera kyçe. Pas ngjarjes, kamera ka kapur momentin kur autori i dyshuar, viktima, dhe një shok i tij, gjithashtu i plagosur, bashkë me pesë persona të tjerë, kanë vrapuar në drejtim të kundërt të rrugicës që kishin përshkuar më parë. Nga pamjet rezulton se, përveç tre personave të përmendur, janë identifikuar edhe disa të mitur me inicialet: K.B., M.S., A.M., dhe K.T., si dhe një person tjetër i paidentifikuar ende.

Ky moment i dyti, pas ngjarjes, tregon se njëri nga të miturit ishte i plagosur, duke sugjeruar se ndodhi një përleshje gjatë ngjarjes tragjike. Hetuesit janë duke punuar për të identifikuar të gjithë personat e përfshirë dhe për të zbardhur plotësisht ngjarjen e rëndë.