Të tjera detaje janë zbardhur lidhur me plagosjen e Sokol Dacit, e ndodhur mbrëmjen e djeshme, më 1 shkurt, në fshatin Rrilë të Lezhës.

Sipas burimeve, në vendin ku ndodhi ngjarja ka qenë i pranishëm edhe një efektiv policie, i cili ka deklaruar se nuk ka arritur të shohë autorët e sulmit. Ndërkohë, raportohet se nga të shtënat me armë mund të ketë mbetur i lënduar edhe një anëtar i familjes Nikulaj, por deri tani asnjë person tjetër i plagosur nuk është paraqitur në ambientet e spitalit.

Plagosja ka ndodhur në qendër të fshatit Rrilë, ku ndaj një dyqani është qëlluar me armë zjarri. Policia, e cila mbërriti në vendngjarje disa minuta pas incidentit, bëri me dije se i plagosur ka mbetur shtetasi Sokol Daci, 30 vjeç, i cili në momentin e sulmit ndodhej brenda një berberhaneje.

Pamjet nga vendi i ngjarjes tregojnë se autorët kanë qëlluar me breshëri, duke shkaktuar dëmtime të shumta në fasadën e dyqanit. I riu i plagosur është transportuar menjëherë drejt spitalit rajonal të Lezhës, ku ka marrë ndihmën e parë mjekësore.

Policia ka nisur hetimet për zbardhjen e plotë të rrethanave të ngjarjes, ndërsa po punohet për identifikimin dhe kapjen e autorëve.