Prishtinë – Policia e Kosovës ka publikuar foton e autorit të dyshuar për vrasjen që ndodhi mbrëmjen e djeshme në lagjen Hajvali të Prishtinës, duke bërë thirrje për ndihmë qytetarëve në kapjen e tij.

Sipas njoftimit zyrtar, autori i dyshuar është identifikuar si Xhemail Bajram Nuhiu, i cili pas ngjarjes rreth orës 22:00 ndodhet në arrati. Viktima, me inicialet M.M., u qëllua me armë zjarri dhe u dërgua menjëherë në Qendrën Klinike Universitare të Kosovës, ku më pas u konstatua vdekja e tij.

Policia kërkon nga të gjithë qytetarët që të kenë ndonjë informacion për vendodhjen e autorit të kontaktojnë në adresën elektronike [email protected], përmes aplikacionit “Lajmero Policinë” në Android, ose në numrin 192.

Hetimet për zbardhjen e plotë të ngjarjes dhe kapjen e autorit vazhdojnë intensivisht nga forcat e rendit.