Dhjetëra shpendë të ngordhur janë gjetur në plazhin e vjetër në Vlorë pasditen e të shtunës, duke alarmuar autoritetet lokale dhe specialistët e veterinarisë. Shpendët e gjetur dyshohet të kenë vdekur nga gripi i shpendëve. Pas njoftimit nga banorët e zonës, specialistët e shërbimit veterinar kanë marrë mostra nga shpendët dhe i kanë dërguar për analiza në Institutin e Sigurisë Ushqimore dhe Veterinare në Tiranë.

Përgjigjja për analizat pritet të dalë pas tre ditësh. Në një masë paraprake, shpendët janë asgjësuar për të parandaluar përhapjen e mundshme të gripit. Specialistët kanë theksuar se rreziku i kalimit të virusit te njerëzit është i ulët, dhe se transmetimi mund të ndodhë vetëm nga kontakti me shpendët e sëmurë. Autoritetet vazhdojnë të monitorojnë situatën dhe po ndërmarrin masa për të parandaluar çdo pasojë të mundshme.