Dhoma e Avokatisë Durrës ka vendosur të bojkotojë të gjitha seancat gjyqësore civile dhe penale nga data 3 deri më 7 qershor 2024. Ky vendim është marrë për shkak të moszgjidhjes së problemit të lënies së avokatëve jashtë ambienteve të Gjykatës së Shkallës së Parë të Juridiksionit të Përgjithshëm Durrës.

Në një letër drejtuar Kryetares së KLGJ-së, Gjykatës së Durrësit dhe Dhomës së Avokatisë në Tiranë, Dhoma e Avokatisë Durrës informon se avokatët nuk do të marrin pjesë në gjyqe gjatë kësaj periudhe. Përjashtim do të bëjnë vetëm seancat për masat e sigurimit, zëvendësimin dhe shuarjen e tyre.

Letra e Dhomës së Avokatisë Durrës përmban mesazhin e mëposhtëm:

“Të nderuar!

Pas ezaurimit të të gjitha mundësive për zgjidhjen e problemit të lënies së Avokatëve jashtë ambienteve të Gjykatës së Shkallës së Parë të Juridiksionit të Përgjithshëm Durrës, si dhe mbledhjes së jashtëzakonshme të anëtarëve të Dhomës së Avokatisë Durrës, Kryesisë së Dhomës dhe Komitetit Drejtues, Dhoma e Avokatisë Durrës ka marrë vendimin për:

‘…Bojkotimin e të gjitha seancave gjyqësore civile dhe penale.’

Përjashtim nga ky bojkotim bëjnë vetëm seancat gjyqësore për masat e sigurimit, zëvendësimin dhe shuarjen e tyre. Ky vendim ka efekt për datat 03.06.2024-07.06.2024, periudhë gjatë ose pas së cilës dhoma do të dalë me një vendim të ri.

Sqarojmë se të gjithë avokatët të cilët do të rezultojnë se kanë marrë pjesë në seancat gjyqësore për të cilat me këtë vendim është bërë bojkotimi i tyre, Komiteti i Disiplinës do të fillojë procedim administrativ ndaj tyre.”

Dhoma e Avokatisë Durrës ka vendosur gjithashtu që nëse nuk do të ketë zgjidhje për problemet e ngritura, do të dalë me vendime të reja pas datës 7 qershor.