Dhuratat zyrtare të marra nga kryeministrja italiane, Giorgia Meloni, gjatë tre viteve të fundit do të dalin në ankand, ndërsa të ardhurat e fituara do të shkojnë për organizata dhe shoqata jofitimprurëse.
Ndër dhuratat më të veçanta që do të shiten janë një set bizhuterish nga Libia, një palë këpucë pitoni blu me taka të arta dhe një tablet i dhuruar nga presidenti ukrainas Volodymyr Zelensky. Deri tani, lista e dhuratave arrin në 270 njësi, të marra gjatë vizitave zyrtare të kryeministres në mbarë botën.
Sipas ligjit italian, dhuratat me vlerë mbi 300 euro nuk mund të mbahen nga individët, ndërsa ato më të vlefshmet ruhen në kasafortë zyrtare. Në fund të tetorit, sekretari i përgjithshëm i Palazzo Chigi urdhëroi shitjen e këtyre aseteve, dhe ditët e fundit një rezolutë ia besoi kompanisë “Bertolami Fine Art” menaxhimin e ankandit.
Galeria romake e artit do të vlerësojë secilën dhuratë para shitjes, ndërsa kompania fitoi kontratën prej 40,000 eurosh, duke ofruar 5% të të ardhurave si shpërblim. Data e ankandit dhe lista finale e objekteve që do të dalin në shitje nuk janë bërë ende të ditura.
