Kryeministri i Kosovës, Albin Kurti, ka deklaruar një ditë para takimit në Bruksel se dialogu me Serbinë do të ndërpritet nëse Serbia nuk dënohet dhe nuk i nënshtrohet sanksioneve për sulmin e 24 shtatorit në veri të Kosovës.

Në takimin e caktuar të enjten në Bruksel, Albin Kurti dhe presidenti i Serbisë, Aleksandar Vuçiq, do të jenë të pranishëm, të ftuar nga Bashkimi Evropian. Atje, ata pritet të takohen veçmas edhe me udhëheqës të rëndësishëm të vendeve të tjera të BE-së, si presidentin e Francës, Emmanuel Macron, kryeministren e Italisë, Giorgia Meloni, kancelarin e Gjermanisë, Olaf Scholz, dhe shefin e politikës së jashtme të BE-së, Josep Borrell.

Kurti ka bërë të ditur në një intervistë për Financial Times se nëse Serbia nuk i nënshtrohet sanksioneve dhe nuk dënohet për sulmin e 24 shtatorit, ata do të shohin dialogun si një përpjekje të dështuar për menaxhimin e krizës dhe se normalizimi i marrëdhënieve midis dy vendeve do të harrohet plotësisht. Kjo situatë thekson se tensionet dhe sfidat në marrëdhëniet ndërmjet Kosovës dhe Serbisë vazhdojnë të jenë të ndjeshme dhe të ndërlikuara.

Kurti, po ashtu, i akuzoi sulmuesit e Policisë së Kosovës gjatë sulmit të 24 shtatorit në Banjskë të Zveçanit, ku mbeti i vrarë rreshteri Afrim Bunjaku, se u përpoqën “ta nisin një konflikt të ri të armatosur, një luftë të re në Kosovë për ta aneksuar pjesën veriore të vendit”.

Kosova e ka akuzuar vazhdimisht Serbinë se tentoi aneksimin e veriut të vendit, gjë që është mohuar nga Beogradi.

Kryeministri kosovar theksoi se pas sulmit të muajit të kaluar “çdo gjë ka ndryshuar. Ne nuk mund të vazhdojmë normalisht.”

Ai i bëri thirrje përfaqësuesit special të Bashkimit Evropian (BE) për dialogun ndërmjet Kosovës dhe Serbisë, Mirosllav Lajçak, të mos “e cilësojë më Serbinë si forcë mbinatyrore, një lloj ariu të paarsyeshëm të cilin duhet ta ushqejmë me qengja për ta qetësuar. Kjo duhet të marrë fund për hir të normalizimit, paqes dhe sigurisë”.

Misioni paqeruajtës i NATO-s në Kosovë, KFOR, është përforcuar me qindra trupa dhe pajisje të rënda shtesë.

Derisa Kurti e ka mirëpritur këtë, ai e ka kundërshtuar angazhimin më aktiv të kësaj force në territorin e Kosovës.

“Ata janë të nevojshëm për siguri dhe mbrojtje.. dhe kështu do të mbetet. Ne nuk kemi nevojë ta bëjmë KFOR-in reagues të parë”.

Në Kosovë, KFOR-i është reaguesi i tretë, pas Policisë së Kosovës dhe EULEX-it