Ministrja e Shëndetësisë dhe Mbrojtjes Sociale, Albana Koçiu, theksoi rëndësinë e gjuhës së shenjave si një të drejtë gjuhësore për personat që nuk dëgjojnë, në një mesazh të publikuar në rrjetet sociale për Ditën Ndërkombëtare të Gjuhës së Shenjave.

“Një urë që lidh botët, gjuha e shenjave ndihmon në ndërtimin e komuniteteve dhe promovimin e përfshirjes. Sot dhe çdo ditë, le të respektojmë të drejtën e të gjithëve për të shprehur veten në mënyrën që u përshtatet më shumë. Bashkë mund të krijojmë një shoqëri ku çdo zë, edhe ai pa fjalë, dëgjohet dhe vlerësohet,” u shpreh Koçiu.

Dita Ndërkombëtare e Gjuhëve të Shenjave ofron një mundësi për të mbështetur identitetin gjuhësor dhe diversitetin kulturor të personave që nuk dëgjojnë. Asambleja e Përgjithshme e OKB-së shpalli 23 Shtatorin si Ditën Ndërkombëtare të Gjuhëve të Shenjave me qëllimin e rritjes së ndërgjegjësimit për rëndësinë e kësaj gjuhe në realizimin e plotë të të drejtave të njeriut për individët që përdorin gjuhën e shenjave.