Kryeministri izraelit Benjamin Netanyahu deklaroi në fillim të mbledhjes së kabinetit se dy xhepa të izoluar të Hamasit që ende veprojnë në territorin e Rripit të Gazës — njëri në Rafah dhe tjetri në Khan Younis — do të shkatërrohen.
“Do të shkatërrohen,” tha ai, duke i quajtur përpjekjet e Hamasit “të mjerueshme” dhe akuzuar grupin për tentativë mashtrimi ndaj Izraelit, Shteteve të Bashkuara dhe komunitetit ndërkombëtar.

Netanyahu theksoi se mbrojtja e forcave të IDF në Gaza është prioriteti kryesor i qeverisë së tij. “Udhëzimi im është i qartë. Nëse do të ketë ndonjë përpjekje për t’i dëmtuar ushtarët tanë, do të godasim këdo që sulmon dhe rrjetet e tyre, për të mbrojtur trupat tanë,” tha kreu i ekzekutivit.

Ai shtoi se Izraeli informon partnerët, përfshirë Shtetet e Bashkuara, por nuk kërkon leje për vendimet që merr për sigurinë: “Ne informojmë miqtë tanë amerikanë, por nuk kërkojmë lejen e tyre.” Netanyahu edhe njëherë përsëriti synimin e tij për çarmatimin e Hamasit dhe demilitarizimin e Gazës, duke thënë se kjo është pjesë e kornizës së diskutuar me Presidentin Trump — dhe se, nëse një rrugë nuk sjell rezultat, do të përdoren mjetet e tjera që “të gjithë e dinë”.

Përsa i përket situatës në Liban, Netanyahu paralajmëroi se Izraeli do të veprojë për të parandaluar krijimin e një fronte të ri: “Ne presim nga qeveria e Libanit të përmbushë zotimet e saj, domethënë të çarmatosë Hezbollahun. Por do të ushtrojmë të drejtën tonë për vetëmbrojtje.”

Kryeministri shtoi gjithashtu se Izraeli është i vendosur të kundërshtojë kërcënimet e grupeve si Houthi nga Jemeni, duke thënë se vendi do të ndërmarrë veprime për të neutralizuar kërcënimet që vijnë nga ana e tyre.

Deklaratat e Netanyahu vijnë në një moment të tensionuar, ndërsa diskutimet ndërkombëtare për të ardhmen e administrimit dhe sigurisë së Gazës vazhdojnë — dhe ndërsa Izraeli përgatitet për hapa të mëtejshëm ushtarakë kundër strukturave të mbetura të Hamasit.