Kreu i Republikës Srpska, Milorad Dodik, ka ngritur akuza serioze kundër shërbimeve të inteligjencës së Bosnjë dhe Hercegovinës, duke pretenduar se ata kanë planifikuar eliminimin fizik të tij dhe të Presidentit të Serbisë, Aleksandar Vuçiç. Në një prononcim për mediat në Sarajevë, Dodik tha se plani për vrasjen e tyre ishte përgatitur nga shërbimet boshnjake të inteligjencës në bashkëpunim me ish-drejtorin e agjencisë, Osman Mehmedagiç.

Sipas Dodikut, ky plan kishte për qëllim të eliminonte atë dhe Vuçiçin, si dhe persona të tjerë që ndërhyjnë në interesat boshnjake. Sanja Vuliç, kryetare e klubit të deputetëve të SNSD-së në Dhomën e Përfaqësuesve të Asamblesë Parlamentare të Bosnjës dhe Hercegovinës, kishte deklaruar më herët këtë vit se dispononte “informacione të caktuara” nga ambasada amerikane, që konfirmonin një komplot për vrasjen e Dodikut.

Akuzat e Dodikut kanë krijuar tronditje në rajon, duke ngritur shqetësime të mëtejshme për tensionet e vazhdueshme politike dhe etnike në Bosnjë dhe Hercegovinë.