Presidenti i Republikës Sërpska, Millorad Dodik, ka sfiduar vendimin e Gjykatës Kushtetuese të Bosnje dhe Hercegovinës duke vendosur flamurin e Serbisë në hyrje të selisë së tij më 13 shkurt, vetëm një ditë pasi kjo gjykatë ndaloi shfaqjen e simboleve të shteteve të huaja në këtë entitet.

Krahas flamurit të Serbisë, në hyrjen e selisë së Dodikut valëvitet edhe flamuri i Republikës Sërpska, por mungon çdo simbol i shtetit të Bosnje dhe Hercegovinës.

Ndërkohë, toga e nderit e Ministrisë së Punëve të Brendshme të Republikës Sërpska ekzekutoi himnin e Serbisë, “Zoti i drejtësisë”, si pjesë e përgatitjeve për vizitën e presidentit serb, Aleksandar Vuçiq, në Banja Llukë dhe shënimin e përbashkët të Ditës së Shtetësisë së Serbisë dhe ashtuquajturës “Ditë e Shtetit” të Republikës Sërpska.

Vendimi i Gjykatës Kushtetuese dhe sfida e Dodikutf

Gjykata Kushtetuese e Bosnje dhe Hercegovinës vendosi më 12 shkurt pezullimin e dispozitave ligjore në Republikën Sërpska që lejonin shfaqjen e simboleve të shteteve të huaja, duke argumentuar se kjo përbën shkelje të sovranitetit dhe integritetit territorial të Bosnje dhe Hercegovinës.

“Shfaqja e simboleve të shteteve të huaja krahas simboleve të entiteteve, me ose pa simbole të shtetit të Bosnje dhe Hercegovinës, mund të krijojë iluzionin e mosekzistencës së sovranitetit, integritetit territorial dhe pavarësisë politike të Bosnje dhe Hercegovinës”, thuhet në vendimin e Gjykatës Kushtetuese.

Megjithatë, Dodik nuk e ka marrë parasysh këtë vendim dhe ka vazhduar me agjendën e tij politike, duke e paraqitur Republikën Sërpska si një shtet të pavarur nga Bosnje dhe Hercegovina. Në këtë frymë, flamuj të Serbisë dhe Republikës Sërpska janë vendosur edhe në oborrin e Tempullit të Krishtit Shpëtimtar në Banja Llukë.

Përplasjet politike dhe reagimet ndërkombëtare

Vendosja e flamujve serbë në Republikën Sërpska dhe përpjekjet për të festuar bashkërisht Ditën e Shtetësisë së Serbisë dhe të këtij entiteti janë pjesë e një strategjie të gjatë të Dodikut për të forcuar lidhjet me Beogradin dhe për të sfiduar autoritetin e Bosnje dhe Hercegovinës.

Në qershor 2023, i ashtuquajturi “Kuvendi gjithëserb” në Beograd vendosi që Dita e Shtetësisë së Serbisë të festohej edhe si “Dita e Shtetësisë” së Republikës Sërpska, gjë që u dënua nga anëtarët e Presidencës së Bosnje dhe Hercegovinës, Denis Beqiroviq dhe Zhelko Komshiq, si dhe nga Bashkimi Europian dhe Shtetet e Bashkuara të Amerikës.

Të gjithë liderët kryesorë të Republikës Sërpska, përfshirë Dodikun, ndodhen në listën e sanksioneve të SHBA-së për veprime që minojnë stabilitetin dhe integritetin e Bosnje dhe Hercegovinës.

Vendimi i Gjykatës Kushtetuese për ndalimin e flamujve të shteteve të tjera mbetet në fuqi derisa të merret një vendim përfundimtar mbi ndryshimet në Ligjin për përdorimin e flamurit, stemës dhe himnit të Republikës Sërpska.