Komisioni Qendror i Zgjedhjeve (KQZ) ka dorëzuar në Prokurorinë e Posaçme (SPAK) dokumentacionin e plotë që lidhet me dy tenderë të diskutueshëm, të zhvilluar në kuadër të zgjedhjeve parlamentare të vitit 2021. Këto tenderë, me një vlerë totale prej 21 milionë dollarësh, përfshijnë pajisjet e identifikimit biometrik të votuesve dhe sistemin e votimit dhe numërimit elektronik të zgjedhësve.

Tenderët janë zhvilluar pa garë dhe janë fituar nga kompania “Smartmatic International Holding B.V.” në kushte që kanë ngjallur dyshime për shkelje të procedurave të tenderimit. SPAK ka nisur hetime intensive për të verifikuar nëse ka pasur shkelje ligjore apo korrupsion nga ana e zyrtarëve të KQZ-së, përfshirë kryetarin e institucionit, Ilirjan Celibashin.

Tenderi i parë, me referencën REF-83073-12-23-2020, kishte për qëllim blerjen e pajisjeve për identifikimin elektronik të votuesve, një projekt kyç për zgjedhjet e 25 Prillit 2021. Procedura u zhvillua më 24 dhjetor 2020 dhe në janar 2021, KQZ pranoi ofertën e kompanisë “Smartmatic”, e cila ishte e vetmja pjesëmarrëse në garë. Kompania e realizoi projektin për një vlerë afër 20 milion dollarë, pak nën fondin limit prej më shumë se 21 milionë dollarësh.

Tenderi i dytë, me referencën REF-89113-03-04-2021, kishte të bënte me pajisjet për votimin dhe numërimin elektronik në një projekt pilot në njësinë administrative nr. 10 në Tiranë. Procedura, ashtu si në tenderin e parë, u zhvillua me negocim, dhe kompania “Smartmatic” fitoi kontratën për rreth 1 milion dollarë, me një ofertë që ishte pak nën fondin limit.

Hetimet e SPAK po vazhdojnë dhe pritet që si rezultat i tyre, të ketë arrestime të zyrtarëve të lartë të KQZ-së që dyshohet se janë implikuar në këtë aferë.