Donald Trump është rikthyer zyrtarisht në drejtimin e Shteteve të Bashkuara të Amerikës, pasi u betua në Capitol si Presidenti i 47-të i vendit. Në fjalimin e tij hapës, ai bëri një sërë premtimesh të forta dhe theksoi vizionin e tij për një Amerikë më të fuqishme dhe më të bashkuar.

“Do të forcoj një shoqëri që i jep fund racizmit dhe bazohet tek merita. Nga sot, do të kemi dy gjini: mashkull dhe femër,” deklaroi ai.

Trump premtoi gjithashtu mbështetje të pakushtëzuar për ushtrinë amerikane, duke theksuar se:
“Këtë javë do të nënshkruaj një urdhër që luftëtarët tanë të mos përballen me eksperimente ndërkohë që janë në detyrë. Forcat tona do të kenë një mision: të luftojnë armikun e Amerikës.”

Ai u zotua të forcojë fuqinë ushtarake të SHBA, duke e rikthyer vendin në pozicionin e tij si superfuqia më e madhe globale.
“Njësoj si në 2017-ën, do të kemi ushtrinë më të madhe dhe më të fuqishme në botë,” tha Trump, duke nënvizuar rolin e tij si një “paqebërës, bashkues dhe unifikues.”

Një deklaratë që ka shkaktuar debat ishte ndryshimi i emrit të Gjirit të Meksikës.
“Amerika do të rimarrë vendin e saj të merituar si vendi më i madh dhe më i respektuar. Nga sot, do të ndryshojmë emrin e Gjirit të Meksikës dhe do ta quajmë Gjiri i Amerikës,” tha ai.

Trump gjithashtu u ndal tek marrëdhëniet ndërkombëtare, duke kritikuar trajtimin e SHBA-së në çështjen e Kanalit të Panamasë dhe duke nënvizuar se Panamaja nuk i ka respektuar plotësisht angazhimet ndaj Uashingtonit.

Fjalimi i tij i parë si president ka ngjallur reagime të shumta brenda dhe jashtë SHBA-së, duke sinjalizuar një kthim të fortë të Trumpit në politikën amerikane dhe botërore.