Presidenti Amerikan, Donald Trump, njoftoi mbrëmjen e të dielës se Shtetet e Bashkuara kanë dhënë fund pauzës në ndarjen e informacionit të klasifikuar me Ukrainën, duke përfshirë pamje satelitore të frontit të betejës ku Ukraina mund të ndjekë pozicionet e ushtarëve rusë. Ky hap shënon një avancim të rëndësishëm në bisedimet për arritjen e paqes në Europën Lindore, një nga prioritetet kryesore të administratës Trump.

Presidenti i Shteteve të Bashkuara shprehu besimin se ky veprim do të çojë në një avancim të bisedimeve për paqen midis Washingtonit dhe Kievit, të cilat pritet të zhvillohen këtë javë. Trump theksoi se më e rëndësishme se nënshkrimi i marrëveshjes së mineraleve ose rikthimi i ndihmave ushtarake për Ukrainën është arritja e paqes.

Burime nga Shtëpia e Bardhë treguan për Agjencinë e Lajmeve Reuters dhe BBC se Ukraina ka dhënë një angazhim të fortë për të përparuar me bisedimet e paqes. Presidenti i Ukrainës, Volodymyr Zelensky, ndodhet aktualisht në Arabinë Saudite për bisedime me Princin e Kurorës, dhe përgatitjet për nisjen e negociatave mes Shteteve të Bashkuara dhe Ukrainës janë në zhvillim. Takimi zyrtar i negociatave është planifikuar për të martën, dhe përfaqësuesit e Ukrainës do të jenë Shefi i Shtabit të Zelenskyt Andriy Yerman, Këshilltari i Sigurisë Kombëtare, Ministri i Jashtëm dhe ai i Mbrojtjes.

Delegacioni amerikan, i përbërë nga Sekretari Amerikan i Shtetit Marco Rubio dhe Këshilltari i Sigurisë Kombëtare Mike Waltz, udhëhoqën bisedimet me Ukrainën pas diskutimeve të mëparshme që përfshinin edhe mundësinë e një përfundimi të luftës me Moskën, pa praninë e Ukrainës në tryezën e bisedimeve.

Ky zhvillim pason një periudhë të tensionuar, pas përplasjes midis Presidentit Trump dhe Presidentit Zelensky lidhur me përfshirjen e Ukrainës në bisedimet e paqes. Shtetet e Bashkuara kanë qenë një mbështetës i fuqishëm ushtarak dhe financiar për Ukrainën gjatë tre viteve të luftës për liri. Trump ka theksuar se përfundimi i luftës në Europën Lindore do të jetë një prej prioriteteve të tij më të rëndësishme.