Janë zbardhur informacione të reja mbi dorëheqjen e kryetarit të Bashkisë së Vlorës, Ermal Dredha, një ditë para mbledhjes së Asamblesë së PS-së.

Sipas burimeve, Dredha ka qëndruar në ambientet e bashkisë deri në orën 16:00 të së mërkurës, ku është prezantuar edhe nënkryetari i tretë, Elis Halili. Thuhet se emërimi i Halilit në këtë post u bë vetëm pak orë para dorëheqjes së Dredhës, duke lënë të kuptohet se ky vendim ka një qëllim të qartë: me dorëheqjen e kryebashkiakut, Elis Halili pritet të komandojë Bashkinë e Vlorës deri në zgjedhjen e kryetarit të ri.

Elis Halili është me profesion inxhinier dhe ka qenë më parë përgjegjës i një firme ndërtimi, “Fusha” sh.p.k., në pronësi të biznesmenit Shkëlqim Fusha, i cili ka realizuar disa projekte në qytetin e Vlorës që janë konsideruar të kontestuara dhe me dyshime për korrupsion.

Ky emërim i Halilit vjen në të njëjtën ditë kur Shkëlqim Fusha u mor zyrtarisht në mbrojtje penale nga Prokuroria e Posaçme, për shkak të dosjes që lidhet me Erion Veliajn, për kryerjen e veprës penale të “korrupsionit aktiv të personave të funksionarëve të lartë shtetëror ose të zgjedhurve vendorë”.

Ky zhvillim duket se mund të ndikojë në dinamikën politike të qytetit të Vlorës, duke ngritur pyetje mbi lidhjet mes biznesit privat dhe pushtetit lokal.