Këshilltari për çështjet ekonomike në Partinë Demokratike, Dorian Teliti, gjatë një interviste në një program televiziv, ka kritikuar ashpër rritjen e pensioneve me 4.1% të shpallur së fundmi nga qeveria. Ai e quajti këtë rritje qesharake dhe jo reale, duke theksuar se indeksimi i bërë po zbatohet pjesërisht nga ekzekutivi.
Teliti deklaroi se rritja e pensioneve është shumë larg asaj që nevojitet për të përballuar koston e jetesës. Ai theksoi se edhe shifrat e publikuara nga INSTAT për rritjen e çmimeve të produkteve të shportës me 4.1% janë të pavërteta.
Deklarata e Telitit:
“Qeveria e ka shpallur një indeksim të pensioneve me 4.1%, por kjo nuk përfaqëson një rritje reale. Madje, ky indeksim po zbatohet pjesërisht. Si konsumatorë, e dimë që gjatë këtij viti çmimet janë rritur shumë më tepër se kaq. Shifrat e shpallura nga zyrat qeveritare dhe INSTAT, që çmimet e shportës janë rritur me 4.1%, nuk janë të sakta.”
Ai gjithashtu kritikoi qeverinë për mosrespektimin e ligjit për indeksimin e pensioneve në mënyrë të plotë dhe për aplikimin e një politike që e cilësoi si “lëmoshë”. Sipas Telitit, në praktikë kjo rritje përkthehet në rreth 250 lekë të vjetra në ditë për pensionistët, një shifër që, sipas tij, nuk përputhet aspak me nevojat reale të qytetarëve.
Teliti përfundoi duke theksuar se politika ekonomike e qeverisë po dështon në ofrimin e mbështetjes së nevojshme për qytetarët më të prekur nga inflacioni dhe kriza e rritjes së çmimeve.
