Vetëm 6 ditë pas emërimit në detyrën e drejtorit të spitalit të Dibrës, Ruzhdi Deda është përballur me kërcënime, përndjekje dhe shantazhe të vazhdueshme nga ish-drejtoresha Irini Shehu, e cila është vendosur nën masën e arrestit në shtëpi nga gjykata, pas hetimeve të prokurorisë.
Ngjarja
Sipas dosjes hetimore, konflikti nisi kur Deda e thirri Shehun në zyrë për të marrë sendet personale, por aty shkoi në përplasje verbale që më pas u zhvendos në kërcënime të përsëritura, si në ambientet e spitalit, ashtu edhe në rrjete sociale dhe në grupin e WhatsApp-it të Partisë Socialiste.
Mesazhet kërcënuese
Prokuroria dokumenton mesazhe fyese dhe shantazhuese, përfshirë:
- “Lexoje mirë këtë sms… do të të bëhet hyrja në spital si me Shengen”,
- “Kujdes burrin, se i rrinë gjatë në zyrë” – drejtuar bashkëshortes shtatzënë të Dedës, në muajin e 9-të,
- Mesazhe në 4 të mëngjesit, me përmbajtje denigruese dhe shantazhuese.
Incidentet publike
Një tjetër moment tensioni ndodhi më 22 prill, pas një mbledhjeje të PS, ku Shehu e ofendoi publikisht Deden në prani të koordinatorëve lokalë, duke thelluar përplasjen personale dhe politike mes tyre.
Vendimi i gjykatës
Pas kallëzimit penal dhe administrimit të provave, përfshirë deklarata, pamje dhe mesazhe, gjykata caktoi masën “arrest në shtëpi” për Irini Shehun, për veprën penale të “përndjekjes” dhe shkeljes së dinjitetit të një funksionari publik.
Kjo ngjarje ka ngjallur reagime në opinionin publik dhe në radhët e PS-së lokale, ku tensionet e brendshme dhe lufta për poste po shfaqen në mënyrë të hapur dhe të dhunshme.
