Ekuador, 26 maj 2025 – Një nga njerëzit më të kërkuar të mafias shqiptare, Dritan Gjika, është arrestuar në një operacion të përbashkët mes Interpolit në Ekuador dhe Emiratet e Bashkuara Arabe, me mbështetje nga PAcCTO 2.0 dhe strukturat ndërkombëtare të hetimit.

Gjika, 47 vjeç, rezulton të mbajë dy Njoftime të Kuqe të Interpolit për trafik ndërkombëtar droge, pastrim parash dhe pjesëmarrje në organizatë kriminale. Ai kishte hyrë në Ekuador për herë të parë në vitin 2009 me vizë të përkohshme, për të ngritur më pas një nga rrjetet më të sofistikuara të trafikut të drogës në këtë vend.

Sipas autoriteteve, organizatë kriminale që drejtohej nga Gjika kishte shtrirje të gjerë në Ekuador, Spanjë, Holandë dhe Belgjikë, dhe trafikonte sasi të mëdha lëndësh narkotike drejt Amerikës Qendrore dhe Evropës. Në këtë rrjet ishin të përfshirë edhe punonjës të portit detar, të cilët ndihmonin në kamuflimin e kontejnerëve përmes metodës së ashtuquajtur “grepi i verbër”, duke i kontaminuar me drogë.

Për të fshehur aktivitetin kriminal, Gjika kishte ngritur një sistem të tërë kompanish legjitime, të cilat përdoreshin për pastrim parash dhe mbulim të operacioneve të paligjshme. Ai u identifikua zyrtarisht si kreu i mafias shqiptare në Ekuador më 6 shkurt 2024, pas një bastisjeje në një vilë në Guayaquil.

Aktualisht, ai ndodhet në paraburgim për qëllime ekstradimi, ndërsa autoritetet në Spanjë dhe vende të tjera europiane pritet të kërkojnë dorëzimin e tij për gjykim. Arrestimi i tij konsiderohet një goditje e madhe ndaj krimit të organizuar shqiptar me shtrirje ndërkombëtare.