Dy ngjarje të dhunshme në qytetin e Durrësit, ku dy persona kanë mbetur të plagosur me thikë në rrethana të ndryshme, ndërsa autorët janë ende në kërkim.

Ngjarja e parë ka ndodhur rreth orës 21:00, në lagjen nr. 12, ku pas një konflikti për motive të dobëta, shtetasi I. Ll. dyshohet se ka plagosur me thikë 31-vjeçarin E. G. Ky i fundit ndodhet jashtë rrezikut për jetën, nën kujdesin e mjekëve në spitalin e qytetit. Policia ka nisur kontrollet për kapjen e autorit, ndërsa grupi hetimor ndodhet në vendngjarje për të zbardhur plotësisht rrethanat.

Ngjarja e dytë është shënuar vetëm pak minuta më pas, në lagjen nr. 17, pranë Shërbimit Zjarrfikës. Sipas dëshmive paraprake, një person rreth 40 vjeç, i cili dyshohet se ka qenë në gjendje të dehur, është nxjerrë jashtë nga një lokal nga pronarja, pas një sjelljeje të pahijshme. Në atë moment, një person tjetër, që kishte ardhur nga krahu i kundërt i rrugës, e ka goditur me thikë, duke e lënë të plagosur rëndë.

Autori i kësaj ngjarjeje është larguar me shpejtësi, ndërsa policia po punon për identifikimin dhe kapjen e tij.

Të dy të plagosurit janë transportuar drejt spitalit të Durrësit dhe po marrin ndihmën e nevojshme mjekësore. Policia nuk përjashton mundësinë që ngjarjet të jenë të izoluara, por po heton për çdo lidhje të mundshme mes tyre.