Një autobus me 522 mijë euro dhe mallra kontrabandë u kap në Portin e Durrësit, sapo kishte mbërritur me traget nga Italia. Gjatë operacionit “Eurot”, në pranga ra pronari Elidon Çela dhe dy ndihmësit e tij, të cilët akuzohen për 7 vepra penale. Policia dyshon për të tjerë persona të përfshirë.
Një sasi prej qindra mijëra eurosh është gjetur mesditën e kësaj të premteje të fshehura në një autobus që vinte në Portin e Durrësit nga Bari i Italisë. Bëhet fjalë për 522 mijë euro të padeklaruara që ishin fshehur në tavanin e autobusit, pranë impiantit të kondicionerit. Burime bëjnë me dije se është arrestuar pronari, njëkohësisht edhe shoferi i autobusit, Elidon Çela 32-vjeç si edhe janë ndaluar edhe 2 bashkëpunëtorë të tij, D. K., 36 vjeç, banues në Tiranë dhe A. C., 32 vjeç, banues në Elbasan, ndihmësit e drejtuesit të autobusit.
Ky operacion i koduar ‘Eurot’ ka ardhur si rezultat i një hetimi njëmujor. Uniformat blu kanë pasur informacione se në brendësi të autobusit kishte të fshehura sasi të madha eurosh. Ai është ndalur për një kontroll të imtësishëm ku janë zbuluar plot 522 mijë euro, por jo vetëm. Si rezultat i kontrollit janë gjetur edhe mallra të kontrabanduara (kafe, cigare, pije alkoolike, ilaçe, kuti me mentesha, karroca për fëmijë, elektroshtëpiake dhe veshmbathje).
Autobusit të linjës Padova – Lushnjë me targa AA 633 FZ, në të cilën arrihet të kuptohet edhe vendi se ku ishin fshehur paratë. Këto të fundit ishin në prerje të ndryshme, 10, 20, 50 dhe 100 euro të ndara në 6 qese plastmasi, marketi. Operacioni u krye nga Sektori për Hetimin e Krimeve Ekonomike dhe Financiare, në DVP Durrës, në bashkëpunim me Policinë Kufitare dhe autoritetet doganore në portin e Durrësit.
